سواء بتصلى او لا (تفضل بالدخول)

[size=16]بتصلي؟؟
لو اجابتك ايوة الحمدلله بصلي.. قول الحمدلله الذي هداني و ما كنت لأهتدي لولا أن هداني الله

بس اوعى تكون يتصلي فرض و تسيب فرض.. عارف انك كده بتعبد الله على هواك؟؟
يعني لما ربنا ينادي عليك 5 مرات في اليوم عشان تصلي بين ايديه عزوجل
مرة تستجيب لندائه و مرة لأ و ده طبعا حسب مزاجك
لو مزاجي اني أصلي و عندي وقت اوك هروح أصلي
لكن لو مضايق أو مكتئب أو مستعجل أو مبسوط شويتين يبأه متصليش و تقول أنا مش في المود

هتقولي لا الحمدلله أنا منتظم في كل الفروض
هقولك بس اوعى تكون بتكروت الكام ركعة عشان تقوم تشوف وراك ايه
سواء مسلسل و لا ماتش و لا صحابك اللي مستنيينك
ربنا عزوجل مقالش و لا مرة في القراِن صلوا..بل يقول عزوجل في كل مواضع الصلاة "أقيموا الصلاة" هل أنت بتقيم الصلاة؟؟
تقيم ركوعها و سجودها و تحسن قراءة القراِن و انت واقف بتصلي بين ايديه
تتذله و انت بتدعي..جربت تبكي وانت بين ايديه
أحلى دمعة ..دمعتك اللي نازلة من خشية الله
خوفا من عذابه و طمعا في رضائه

عارف ليه مش عارف تخشع؟؟ عارف ليه مش حاسس بطعم القرب منه ؟
عشان طول اليوم مشغول بالدنيا.. لو بتشتغل ..مشغول بالفلوس و الرزق
لو بتدرس....مشغول بمذاكرتك
بتجري ورا بنت..بتجري ورا لذة
بتجري ورا دنيا
طلع الدنيا شوية من قلبك..عشان حب ربنا يكون ليه مكان في قلبك
ساعتها هتقدر تخشع و تحس بحلاوة الايمان

ازاي عايز تخشع و انت بتصلي و أنت قبل الصلاة مباشرة كنت بتسمع الأغنية دي أو الفيلم ده؟؟
ازاي عايز تخشع و أنت كل اللي شاغل بالك ازاي اوصل للبنت الفلانية؟؟
ازاي تخشع و انت غافل عن ذكر الله طول اليوم

اجعل لسانك رطب بذكر الله طول الوقت

لما تلاقي نفسك فاضي بلاش تسرح,,بلاش تدندن أغنية
لما تلاقي نفسك فاضي ,, سبح,استغفر,احمد,صلي على رسولنا الكريم,اقرأ قراِن

بكده هتكون كل جوارحك لله و هتحس بطمأنينة و بالتالي لما تيجي تصلي هتخشع بإذن الله

طيب هتقولي الحمدلله بخشع أو بجاهد نفسي
بس هقولك أوعى تكون مش بتصلي الصلاة في وقتها
اوعى تكون بتستنى لما تفضى و بعدين تقوم تصلي ..اوعى تكون بتجمع فرضين على بعض

عن ابن مسعود -رضي الله عنه- قال: قال رسول الله -صلى الله عليه وسلم-: أفضل الأعمال الصلاة في أول وقتها رواه الترمذي

و قال الله تعالى: (إن الصلاة كانت على المؤمنين كتابًا موقوتا)

وبالذات طبعا أكتر صلاه مش بنصليها في وقتها هي صلاة الفجر
و لو ذقت أخي الكريم طعم المحافظة على صلاة الفجر خاصة..ما تركتها ابداً

فلا يجوز مطلقا تأخير الصلاة عن وقتها

طيب هتقولي بصلي في الوقت
طيب بالنسبة للشباب و الرجال..اوعى تكون بتصلي في البيت
صلاتك أخي الكريم مكانها المسجد
خطواتك للمسجد بتاخد عليها حسنات و كلنا عارفين الكلام ده
طب ليه مش بتروح المسجد؟؟مستغني عن الحسنات دي؟؟ ده انت في أشد الحوجة لكل حسنة
متفرطش في صلاة الجماعة اللي هي أفضل من صلاتك لوحدك ب27 درجة

ركز في الحدث الشريف ده:
فى البخاري عن أبي هريرة ـ رضي الله عنه ـ أن رسول الله ـ صلى الله عليه وسلم ـ قال: "والذي نفسي بيده قد هممتُ أنْ آمُرَ بَحَطَبٍ فيُحْطَب ثم آمُرَ بالصلاة فيؤذن لها. ثم آمُرَ رجُلًا فيؤمَّ لها. ثم آمر رجلًا فيؤم الناس، ثم أُخالِف إلى رجال أحرق عليهم بيوتهم".

ها؟؟ لسه مصمم متصليش في المسجد؟؟ مش عايز تكون من عمار المساجد؟؟
و كلنا عارفين قصة الرجل الأعمى اللي استأذن الرسول عليه السلام في التخلف عن صلاة الجماعة في المسجد

في صحيح مسلم عن أبي هريرة- رضي الله عنه- عن النبي- صلى الله عليه وسلم- أنه أتاه رجل أعمى، فقال: يا رسول الله ليس لي قائد يقودني إلى المسجد فهل لي من رخصة أن أصلي في بيتي؟ فقال له- صلى الله عليه وسلم-(( هل تسمع النداء بالصلاة؟)) قال نعم قال فأجب

ملكش عذر..مش كده و لا ايه؟؟

طيب لو أنت بتصلي في الوقت و بخشوع و في المسجد و منتظم الحمدلله
اوعى تكون ناسي سنة حبيبك المصطفى عليه السلام
قال صلى الله عليه وسلم (من صلى في يوم وليلة ثنتي عشرة ركعة بني له بيت في الجنة ) أخرجه مسلم
حافظ على النوافل و اكسب بيت في الجنة

بالنسبة بأه لأخي الذي لا يصلي
مش غيران من أخوك اللي بيصلي؟ مش نفسك تدوق الطعم اللي هو حاسس بيه؟

هل تعلم أن الصلاة وصية النبي صلى الله عليه وسلم عند خروجه من الدنيا قال رسول الله صلى عليه وسلم وهو يلفظ أنفاسه الأخيرة : (الصلاة ، الصلاة .وما ملكت أيمانكم ).

هل تعلم أن المولى تبارك وتعالى يبرأ من تارك الصلاة ؟ ... قال رسول الله صلى الله وسلم : ( لا تترك الصلاة متعمدا ، فإنه من ترك الصلاة متعمدا فقد برئت منه ذمة الله ورسوله ) أي ليس له عهد ولا أمان.

- هل تعلم أن النبي صلى الله عليه وسلم وصف تارك الصلاة بالكفرقال رسول الله صلى الله عليه وسلم : (بين الرجل وبين الكفر ترك الصلاة )

هل تعلم كيف يعذب تارك الصلاة في قبره قال رسول الله صلى الله عليه وسلم : (أتينا على رجل مضطجع ، وإذا آخر قائم عليه بصخرة ، وإذا هو يهوي بالصخرة لرأسه فيثلغ رأسه - أي يشدخه - فيتدهده الحجر - أي يتدحرج - فيأخذه فلا يرجع إليه حتى يصبح رأسه كما كان ، ثم يعود عليه فيفعل به مثل ما فعل المرة الأولى ، فقلت : سبحان الله ! ماهذان ؟ فقال جبريل عليه السلام (إنه الرجل ينام عن الصلاة المكتوبه )

- هل تعلم أن أول ما تحاسب عليه الصلاة قال رسول الله صلى الله عليه وسلم : ( أول ما يحاسب به العبد يوم القيامة عن الصلاة ، فإن صلحت ، صلح سائر عمله ، وإن فسدت ، فسد سائر عمله )

- هل تعلم أن تارك الصلاة يحشر يوم القيامة مع فرعونقال رسول الله صلى الله عليه وسلم : ( من حافظ عليها - أي الصلاة - كانت له نورا وبرهانا يوم القيامة ، ومن لم يحافظ عليها لم يكن له نور ولا برهان ، ولا نجاة ، وكان يوم القيامة مع قارون وفرعون وهامان وأبي بن خلف )

- هل تعلم أن تارك الصلاة مع المجرمين في جهنم قال تعالى : {كُلُّ نَفْسٍ بِمَا كَسَبَتْ رَهِينَةٌ * إِلاَّ أَصْحَابَ الْيَمِينِ * فِي جَنَّاتٍ يَتَسَاءَلُونَ * عَنْ الْمُجْرِمِينَ * مَا سَلَكَكُمْ فِي سَقَرَ * قَالُوا لَمْ نَكُ مِنَ الْمُصَلِّينَ }

ها نفسك تصلي؟؟ منا كنت كده زيك و كان نفسي اصلي
خد أول خطوة و بعد كده الموضوع سهل
هتحس انك قريب أوي من ربنا..هتحس انك عزيز عند الله عزوجل
هتحس انك عايز تدعي و هتكون متأكد انه هيستجيب لك

اندم على ما فات و مضى
الحق قبل فوات الأوان
يقول يا ليتني قدمت لحياتي . فيومئذ لا يعذب عذابه أحد ولا يوثق وثاقه أحد""
[/size]